अनौपचारिक क्षेत्र सेवा केन्द्र (इन्सेक)का संस्थापक महासचिव स्वर्गीय प्रकाश काफ्लेको २९ औँ स्मृति दिवसका अवसरमा २७ औँ प्रकाश मानव अधिकार पुरस्कार-२०७७ कैलाली जिल्ला निवासी मानव अधिकार अभियान्ता फिरुलाल चौधरीलाई प्रदान गरिएको छ । साउन १६ गते इन्सेकले धनगढीमा आयोजना गरेको कार्यक्रममा चौधरीलाई सो पुरस्कार प्रदान गरिएको हो ।
सुदूरपश्चिम प्रदेशका आन्तरिक मामिला तथा कानुनमन्त्री पूर्णा जोशीले सामाजिक न्यायका लागि विभिन्न अभियानमा योगदान पुर्याएका तर राज्यले चिन्न नसकेका व्यक्तित्वलाई इन्सेकले सम्मान गरेर मानव अधिकार तथा सामाजिक अभियान्ताहरूलाई उत्प्रेरणा प्रदान गरी सामाजिक सदभाव, न्यायमैत्री समाज र दिगो शान्ति पुनःस्थापनामा सहयोग गरेको बताए ।
सामाजिक विकासमन्त्री लालबहादुर खड्काले विगतमा कमैया मुक्ति, कम्लहरी, दलित, महिला तथा विभिन्न वर्गको उत्थानका लागि विगतमा आन्दोलनहरू भएका भएपनि ती आन्दोलनबाट अधिकारको पूर्णता नभएको बताउँदै नागरिक अधिकार सुनिश्चित गर्न सामाजिक अभियान्ताहरूले अझै वकालत तथा अभियानहरू सञ्चालन गर्न आवश्यक रहेको उल्लेख गर्नु भयो ।
इन्सेकका संस्थापक अध्यक्ष सुशील प्याकुरेलले स्वार्गीय प्रकाश काफ्लेलाई स्मरण गर्दै इन्सेकको स्थापना, प्राची प्रकाशन, राष्ट्रिय मानव अधिकार आयोगको स्थापना र मुलुकमा भएका विभिन्न सामाजिक आन्दोलनमा इन्सेकको भुमिका महत्वपुर्ण रहेको बताउँदै आर्थिक, समाजिक तथा सांस्कृतिक अधिकार सुनिश्चित गर्न राजनीतिक नेतृत्व र सामाजिक अभियान्ताहरूको योगदानलाई संस्थागत गर्न आवश्यक रहेको विचार राखे ।
इन्सेककी अध्यक्ष डाक्टर इन्दिरा श्रेष्ठले स्वर्गीय प्रकाश काफ्लेले मानव अधिकारको रक्षा र विकास, मानव अधिकरको सचेतीकरण तथा जागरणमा महत्वपुर्ण योगदान पुर्याउनु भएको स्मरण गरिन् ।
