पठाओ स्कुटर दुर्घटना हुँदा २ जनाको मृत्यु


काठमाडौंको कलंकीमा मंगलबार साँझ पठाओ स्कुटर दुर्घटना हुँदा २ जनाको मृत्यु भयो । कलंकीस्थित खसी बजारमा बसको ठक्करबाट पठाओ राइडर ३५ वर्षीय राम बहादुर आचार्य र पछाडि सवार बाँके घर भएका ५२ वर्षीय यादव कुमार साहको मृत्यु भएको थियो ।

काठमाडौंमा पठाओ दुर्घटनामा राइडर र यात्रुले ज्यान गुमाएको यो पहिलो घटना हो । सो दुर्घटनापछि मृतकका परिवारले पाउने क्षतिपूर्ति र बीमा रकमबारे प्रश्न उठेको छ । दुर्घटनामा ज्यान गुमाउनेहरूलाई क्षतिपूर्ति दिनेबारे छलफल भइरहेको नेपालस्थित पठाओको कार्यालयले जनाएको छ ।

राइडर र यात्रु दुवैको बीमा गरिएको जानकारी दिँदै नेपालस्थित पठाओ कार्यालयकी मार्केटिङ मेनेजर सुरक्षा हमालले भनिन्, ‘हामीले ५ लाखको बीमा गरेका छौं, सो रकम मृतकका परिवारलाई दिन्छौं ।’ कम्पनीले दुर्घटनामा घाइते हुनेहरुका लागि १ लाखको बिमा गरेको हमालले बताइन्।

ओम जनता यातायात प्रालिमा आवद्ध बसका चालक सुमन कार्कीलाई महानगरीय प्रहरी वृत्त कालिमाटीले पक्राउ गरेको छ । सिन्धुली घर भएका सुमनलाई पक्राउ गरिएको महानगरीय प्रहरी वृत्त कालिमाटीका डिएसपी अनिल घिमिरेले  बताए । मृतकको शव पोष्टमार्टमका लागि त्रिवि शिक्षण अस्पताल महाराजगञ्जमा राखिएको छ ।

ओम जनता यातायात प्रालिका संचालकले नेपाल बन्दको बेलामा कम्पनीको अनुमति बिना चालकले आफ्नै इच्छामा गाडी चलाएको भन्दै क्षतिपूर्ति दिन आनाकानी गरिरहेको पीडित पक्षले गुनासो गरेका छन् । राइडर राम बहादुर आचार्यका सहकर्मी वसन्त कुँवरले भने, ‘यातायात संचालकले गैरजिम्मेवार कुरा गरेर क्षतिपूर्ति दिनबाट आनाकानी गरिरहेका छन् ।’


सम्बन्धित खवर

अन्तर्वार्ता