दाङ, १९ असार। नेकपा एसका उपमहासचिव एवं प्रमुख सचेतक मेटमणि चौधरीले चेक अनादरको उजुरी दिने धात बुढामगरलाई फेरि अर्को ठूलो चेक दिएका छन् । गत असार १७ मा उनले दुई करोड ७० लाख रूपैयाँको नयाँ चेक दिएको खुलेको हो ।
मिलापत्र गर्न मेटमणि र बुढामगर असार १७ गते राति जिल्ला प्रहरी कार्यालय पुगेका थिए । प्रहरी स्रोतका अनुसार मेटमणिले साउन मसान्तमा साटिने गरी २ करोड ७० लाखको चेकसहित सोही मुल्य बराबरको ३१ कठ्ठा जग्गा बुढामगरको नाममा पास गरिदिने सहमति गरेका छन् । उक्त सहमतिपछि जाहेरीकर्ताले मुद्दा प्रक्रियाबाट पछि हट्न तयार भएको स्रोतले बतायो ।
बुढामगरले साउन ६ गते सांसद चौधरीविरूद्व ५ करोड ४० लाख रुपैयाँको चेक अनादरको जाहेरी दिएका थिए । तर असार ८ गते उनले जाहेरी फिर्ताका लागि फेरि अर्को पत्र पठाए ।
मेटमणिले यसअघि शहरी विकासमन्त्री भएका बेला ठेक्का मिलाइदिन भन्दै व्यवसायी बुढामगरसँग ५ करोड ४० लाख रूपैयाँ लिएको आरोप लागेको छ । ठेक्का मिलाउन नसकेपछि मेटमणिले उनलाई लगेको पैसा बराबरको चेक दिएको दावी गरिएको छ ।
मेटमणि र बुढामगरबीच मिलापत्र भएको दाङ प्रहरी प्रमुख अर्जुन तिमिल्सिनाले पुष्टि गरे । ‘दुवै पक्ष आएर मुद्दा अघि नबढाउने सहमति गरेर जानुभएको छ,’ एसपी तिमिल्सिनाले नेपाल प्रेससँग भने, ‘के सहमति भएको हो हामीलाई थाहा हुने कुरा भएन ।’ पीडित भनिएका बुढामगरले आफू र मेटमणि बीच कुरा मिलिसकेको भन्दै सहमतिका बारेमा भने खुल्न चाहेनन् ।
