काठमाडौं, २२ कात्तिक । नेपाली कांग्रेसका नेता तथा पूर्वमन्त्री मोहम्मद अफताब आलमको निधन भएको छ । काठमाडौं मेडिकल कलेज शिक्षण अस्पतालको आईसीयूमा उपचाररत आलमको गएराति २ः५८ बजे निधन भएको हो ।
आलमको शव अन्तिम दाहसंस्कारका लागि गृहजिल्ला रौतहट लगिसकिएको बताइएको छ । ६३ वर्षीय आलमलाई मुटुमा समस्या देखिएपछि अस्पताल भर्ना गरिएको थियो ।
गत जेठमा नक्खु कारागारबाट छुटेलगतै पनि उनलाई ब्रेन स्ट्रोक भएको थियो । त्यतिबेला माइतीघरस्थित अन्नपूर्ण न्यूरो अस्पतालमा उपचार गराइएको थियो ।
२०६४ सालको निर्वाचनको तयारी गरिरहँदा बम विस्फोटमा घाइते भएकालाई जिउँदै इँटाभट्टामा जलाएर हत्या गरेको आरोप आलममाथि थियो । उक्त अभियोगमा जिल्ला अदालत रौतहटले दोषी ठहर गर्दै जन्मकैदको फैसला गरेकोमा उच्च अदालतको वीरगञ्ज इजलासले सफाइ दिएको थियो ।
