काठमाडौं, ७ पुष । राष्ट्रिय प्रजातन्त्र पार्टी (राप्रपा)ले यस वर्ष पनि पृथ्वी जयन्ती भव्य रूपले मनाउने भएको छ । ३०४औँ पृथ्वी जयन्ती तथा राष्ट्रिय एकता दिवस मनाउन अध्यक्ष राजेन्द्र लिङ्देनको अध्यक्षतामा मूल समिति गठन गरिएको छ । साथै, विभिन्न उपसमितिहरू गठन गरिएको प्रवक्ता मोहनकुमार श्रेष्ठले जानकारी दिए ।
“हामीले ०६४ देखि पृथ्वी जयन्तीका अवसरमा चियापान लगायतका कार्यक्रम गर्दै आएका छौँ, यस वर्ष पनि चियापान कार्यक्रमको आयोजना गरेका छौँ र विविध कार्यक्रम गरी मनाउँछौँ,“ प्रवक्ता श्रेष्ठले भने ।
पृथ्वी जयन्ती समारोहका लागि राप्रपाले मञ्च व्यवस्थापन र जलपानको व्यवस्थाका लागि पार्टी केन्द्रीय सचिवालयलाई, अतिथि सत्कार र निमन्त्रणा वितरणका लागि महामन्त्री भुवन पाठकलाई जिम्मेवारी दिएको छ । स्वयंसेवक परिचालनका लागि पार्टीको युवा संगठन र युवा मोर्चालाई, ¥याली र झाँकीका लागि काठमाडौं, भक्तपुर र ललितपुर जिल्लालाई एवं नेवाः झाँकीका लागि राजेन्द्र प्रजापती र नूरज बज्राचार्यलाई संयोजनको जिम्मेवारी दिएको छ ।
पृथ्वी जयन्ती मनाउन उपाध्यक्ष उद्धब पौडेलको संयोजकत्वमा समिति गठन गरिएको छ भने प्रवक्ता मोहनकुमार श्रेष्ठको संयोजकत्वमा केन्द्रीय सदस्यद्वय जनकराज पाठक र उद्धवराज भेटुवाल सदस्य रहेको प्रचार समिति गठन गरेको राप्रपाले जनाएको छ ।
राष्ट्रनिर्माता पृथ्वीनारायण शाहलाई राप्रपाले आदर्श पुरुष घोषणा गरेको छ । सरकारले पृथ्वी जयन्तीका अवसरमा दिइने सार्वजनिक बिदा कटौती गर्ने गरेको भए पनि ०७९ को निर्वाचनपछि पुष्पकमल दाहाल प्रचण्डको नेतृत्वमा राप्रपा सरकारमा जाँदा पृथ्वी जयन्तीको विषयलाई बटमलाइन बनाएको थियो । त्यसपछि सरकारले हरेक वर्ष पृथ्वी जयन्तीमा सार्वजनिक बिदा दिँदै आएको छ ।
